Abdurauf Fitrat korpusi

Koʻz yoshlarim bukun tagʻin oqadimi?
Qizil gulim boshqalargʻa kular-da.
Qizil gulim, borligʻimning sultoni!
Jonim, sening xayolingda kuchaydi.
Yuragimning eng qimmatli armoni.
Nechuk menga marhamating ozaydi?
Ikki koʻzim, malak yuzim, sevdigim,
Jonlar sening yuzginangdan aylansun.
Qizil gulim, qora koʻzim, tilagim,
Dunyo sening boqishingdan oʻrgulsun.
Yovuz yorim, yuzingga hech boqolmam,
Koʻngil dardin oyogʻingga toʻkolmam.
Tuproq kabi yiqilmisham yoʻlingda deya olmam.
Istar esang menga kelib gapurma, yonimda hech oʻturma.
Yolgʻuz yigʻlab uzoqdan turganimni
Koʻrganingda, marhamat et, bir oz kul!