Abdurauf Fitrat korpusi

Goʻzalim, bevafo gulistonim,
Bogʻ umrimda toza rayhonim,
Gʻamu qaygʻularim hujumindan
Sen eding mehribon nigahbonim.
Meni behuda tashlading-ketding,
Nega oʻldirmading-da tark etding.
Kel, gulim, kel, ayoqinggʻa yiqilay,
Bir zamon qoʻy: toʻlib-toshib yigʻlay.
Kuy, bir oz kuyki, xoki poyingni
Surmadek yoshli koʻzuma suray,
Ketma, tur, tingla arzi holimni,
Arz etay holi purmalolimni.
Qani ul damki, sen eding yorim,
Munisim, hamdamim, madadkorim.
Sening ogʻushi iltifotingda
Rohat etmishdi jismi bemorim.
Meni behuda tashlading-ketding,
Nega oʻldirmading-da tark etding.
Kel, ayoqinggʻa qon boʻlub toʻkulay,
Bir nafas dard-hajrdan qutulay.
Kel, goʻzal dilbarim, kel, sochingni
Bir taray, bir oʻpay-da, soʻngra...
Meni behuda tashlading-ketding,
Nega oʻldirmading-da tark etding.