Abdurauf Fitrat korpusi

Ey Ulugʻ Turon, arslonlar oʻlkasi!
Senga ne boʻldi?
Holnig qalaydir?
Nechuk kunlarga qolding?
Ey Chingizlarning, Temurlarning, oʻgʻuzlarning, Otillalarning shonli beshiklari!
Qani u chiqdiging yuksak oʻrinlar?
Qullik chuqurlarigʻa nedan tushding?!
Dunyoni “urho”lari bilan titratkan yoʻlbars yurakli bolalaring qani?
Yer tuprogʻini koʻklarga uchiraturgan togʻ gavdali oʻgʻlonlaring qani?
Nechun tovushlari chiqmaydir?
Yer yuzining bir necha polvonlari boʻlgan botir turklaring qani?
Nechun chekindilar?
Nechun ketdilar?
Kurash maydonlarini oʻzgalarga nechun qoʻydilar?
Nechun.... Nechun... nechun..? Gapur menga, ey Ulugʻ Turon, arslonlar oʻlkasi!
Senga ne boʻldi?!
Yer yuzining buyuk saltanatlarini sen qurmadingmi?
Hindistonning, Eronning, Ovroʻpaning ulugʻ xoqonlarini sen yubormadingmi?
Ey xoqonlar oʻchogʻi!
Ey qahramonlar tugʻoyi!
Qani u chaqmoq chaqishli botir xoqonlaring?
Qani avvalgi oʻq yurushli, otli beklaring?
Nechun “urho”laring eshitilmaydir?
Dunyo xalqini buysundirmagan saltanatlaring nechun buzildi?
Insonlik olamini qanotlari ostinda olgan xoqonlikning nechun kuchi oʻldi? Kuchingmi ketdi?
Kimsasizmi qoldi? Yoʻq... yoʻq... Tangri haqqi uchun yoʻq!..
Sen kuchsiz emassan, sen kimsasiz emassan!
Bugun yer yuzida sakson milioʻn bolang bor.
Bularning tomirlaridagi qon Chingizlarning, temurlarning qonidir.
Bularning kuchlari sening kuchingdir!
Ey Ulugʻ Turon, arslonlar oʻlkasi! Qaygʻurma!
Eski davlating, eski saltanatnig, eski yigitlaring, eski arslonlaring hammasi bor, hech biri yoʻqolmamishdir.
Yolgʻiz... Oh, yolgʻiz... tarqalmishdir.